שִׁיר מִזְמוֹר לְאָבִי וּלְאִמִּי

שִׁיר מִזְמוֹר לְאָבִי וּלְאִמִּי

 לְךָ אָבִי מִזְמוֹר לְתוֹדָה אָשִׁירָה

כִּי הִשְׁלַכְתָּ אַחֲרֵי גַוֶּךָ

אֶרֶץ אֲשֶׁר לֹא בְמִסְכֵּנֻת אָכַלְתָּ בָּהּ לֶחֶם

לֹא חָסַרְתָּ כֹּל בָּהּ

אֲזַמֵּר לָךְ אִמִּי דִּבְרֵי שִׁיר

עָזַבְתְּ אָבִיךְ וְאִמֵּךְ וְאֶרֶץ מוֹלַדְתֵּךְ

וַתֵּלְכִי עִם אִישֵׁךְ

אֶל אֶרֶץ לֹא זְרוּעָה

אֶרֶץ לוֹא נוֹשָׁבָה, שְׁמָמָה וְצִיָּה

עֲזַבְתֶּם לַאֲחֵרִים חֵילְכֶם, כָּל אֲשֶׁר לָכֶם

לֹא הִבַּטְתֶּם אַחֲרֵיכֶם, הוֹרַי

בְּקוּם עָלֵינוּ אָדָם, אָבִי,

שָׁלַח הַגּוֹמֵל לְחַיָּבִים טוֹבוֹת מַלְאָכוֹ לְפָנֶיךָ

וַיֹּאמֶר הִמָּלֵט עַל נַפְשֶׁךָ

מַהֲרָה וְלֵכָה כִּי פָשְׁטוּ פֹּעֲלֵי אָוֶן

סָבִיב רְשָׁעִים יִתְהַלָּכוּן

וַתֹּאמֶר אִמִּי מְהֵרָה חוּשָׁה אַל תַּעֲמֹד

וּמַלֵּט אֶת נַפְשֵׁנוּ וְאֶת נֶפֶשׁ עוֹלָלֶינוּ

וַתַּשְׁלִיכוּ אֶת נַפְשְׁכֶם מִנֶּגֶד

וַתֵּלְכוּ שְׁנֵיכֶם יַחְדָּו

לָשׁוּב אֶל אֶרֶץ אֲבֹתֵיכֶם

אֲשֶׁר שְׁנוֹת דּוֹר וָדוֹר

הֵמָּה מְנַשְּׂאִים אֶת נַפְשָׁם לָשׁוּב לָשֶׁבֶת

עַל הָרֵי יִשְׂרָאֵל אֲשֶׁר הָיוּ לְחָרְבָּה תָּמִיד

אֶרֶץ מְשׁוֹבֶבֶת מֵחֶרֶב

מְקֻבֶּצֶת מֵעַמִּים רַבִּים

וַתִּמְצְאוּ אֲנִיָּה בָּאָה פָּלֶשְׂתִּינָה, נוֹאֵמִיוּלְיָה שְׁמָהּ,

וַתִּתְּנוּ שְׂכָרָהּ וַתֵּרְדוּ בָּהּ אֶל מַיִם רַבִּים

בַּשִׁשִׁי בְּשַׁבָּת בְּשִׁבְעָה עָשָׂר בֶּאֱלוּל תרצ"ט

אֶל נְהַר הַדָּנוּבָּה, יֶהֱמוּ יֶחְמְרוּ מֵימָיו

וּמִן הַנָּהָר אֶל הַיָּם הַשָּׁחוֹר

וַתִּמְצָא אֳנִיַּת הַמַּעְפִּילִים בַּיָּם דָּרֶךְ

וּבְמַיִם עַזִּים נְתִיבָה לַעֲבֹר גְּאוּלִים

וַתַפְלִיג אֶל הַיָּם הַגָּדוֹל

וַיְהִי סַעַר גָּדוֹל בַּיָּם וַיִּתְגָּעֲשׁוּ וַיֶּהֱמוּ גַּלָּיו

נוֹעַ תָּנוּעַ הַסְּפִינָה כַּשִּׁכּוֹר וְהִתְנוֹדְדָה כַּמְּלוּנָה

וַיֶּחֱזַק הָרָעָב בָּאֲנִיָּה וְלֹא הָיָה לֶחֶם

כִּי הַלֶּחֶם יָבֵשׁ וְהָיָה נִקֻּדִים

וְהַמַּיִם הָיוּ הָלוֹךְ וְחָסוֹר

וַתָּנַח הַסְּפִינָה בִּנְמַל חֵיפָה

בְּתִשְׁעָה לַחֹדֶשׁ הַשְּׁבִיעִי בֵּעֶרֶב יוֹם הַכִּפֻּרִים

וַיֵּרְדוּ כָּל הָאֲנָשִׁים הָעֹלִים אֶל הַיַּבָּשָׁה

הַמַּעְפִּילִים אֶל הָאָרֶץ עָמָדוּ

וַיַּעֲלוּ וַיָּבֹאוּ הוֹרַי יְרוּשָׁלִַם

וַיַּעַמְדוּ לְסַפֵּר בְּצִיּוֹן שֵׁם ה' וּתְהִלָּתוֹ.

אָבִי אָבִי, שָׂא נָא עֵינֶיךָ וּרְאֵה

זְקֵנִים וּזְקֵנוֹת יוֹשְׁבִים בִּרְחֹבוֹת יְרוּשָׁלִָיִם

וְאִישׁ מִשְׁעַנְתּוֹ בְּיָדוֹ מֵרֹב יָמִים

שְׂאִי אִמִּי הוֹרָתִי סָבִיב עֵינַיִךְ וּרְאִי

יְלָדִים וִילָדוֹת מְשַׂחֲקִים בִּרְחֹבֹתֶיהָ

הַחֲיִתֶם אָבִי וְאִמִּי אֶת אַחִי וְאֶת אֲחוֹתִי

הִצַּלְתֶּם אֶת נַפְשֹׁתָּם מִמָּוֶת

וְהָיְתָה לָכֶם נַפְשָׁם לְשָׁלָל

אִמָּא, אַבָּא, הוֹרַי שֶׁאָהֲבָה נַפְשִׁי

בְּמַקֶּלְכֶם עֲבַרְתֶּם אֶת הַיָּם הָאַחֲרוֹן

וְעַתָּה הֱיִיתֶם לְמַחֲנוֹת רַבִּים וַעֲצוּמִים

כִּנְחָלִים נִטָּיוּ כְּגַנֹּת עֲלֵי נָהָר

כַּאֲהָלִים נָטַע ה' כַּאֲרָזִים עֲלֵי מָיִם

תִּכָּתֶב זֹאת לְדּוֹר אַחֲרוֹן

בָּנִים יִוָּלֵדוּ יָקֻמוּ וִיסַפְּרוּ לִבְנֵיהֶם

וְעַם נוֹשַׁע יְהַלֶּל יָהּ

כֹּל הַנְּשָׁמָה תְּהַלֵּל יָהּ הַלְלוּ יָהּ.